آخر الأخبار

أيام العيد – سماح صافي بايزيد

المصدر: http://stforum.spacetoon.com

سماح صافي بايزيد

أيام ما كنا وأخيراً نطلع البيحامات من الكياس الجديدة ونلبسها بعد حمام العيد..
أيام ما كتا نروح ننام بدري كتير مشان ييجي العيد بسرعة..

أيام ما كنا نصحى بالليل ونتسلل لغرفة الضيوف نوكل الي فيه النصيب “بالسر” من علبة الشوكلاتة الي صارت معبية وعلبة المعمول الي مرتبة عالتكة ومعمول التمر بمضيقية ومعمول الجوز بمضيفية تانية وفناجين القهوة عالطاولة بتستنى بدلة القهوة السخنة الصبح تلحقها..

أيام ما كنا نركض قبل الإمام عالساحة وفاهمين موضوع تكبيرات العيد بأنو البقاء للي صوته أعلى..

أيام ماكنا نروح نجيب مع أبوي الغالي وإخواتي حمص وفول وفلافل وخبز ساخن ونخلص كيس الفلافل قبل ما نوصل البيت..


أيام ماكنا نلبس الأواعي الجداد الي قسناهم قبل العيد ألف مرة وأخيراً إجا الوقت الحقيقي للبسهم ونلبس الجرابات البيض الي بكشكش الجداد والإكسسورات الملونة ونحمل البكلات ونتسابق عند إمي حبيبتي تسرحلنا شعرنا..


أيام ما كتا نتعطر قبل ما نروح نسلم عإمي وأبوي الي إلنا معهم من الصبح ونبوس ايديهم الدافية ونوخد العيدية ونختفي بعديها..


أيام ما كانت شنتة العيد الصغيرة وما فيها من شوكلاتة وبكلات وعيديات وفراطة ومحارم أهم من البنك المركزي كله..


أيام ما كانت كل العيديات تروح لصاحب الدكانة بآخر الشارع الي زهقنا رايحين جايين خلصنا كل الشيبس والشوكلاتة والألعاب والفقيع الي عنده..


أيام ماكنا نركض نسلم عكل حدا بزورنا لتلات أهداف لا أكثر:
1- نورجيهم أواعينا العيد 2- نوخد العيدية منهم 3- نتضيف بالمعية للمرة المليون كعك وشوكلاتة معهم..


أيام لما ما كنا نعرف شو يعني”سعرات حرارية” ولا “كالوريز” وكان مفعول الكعك والشوكلاتة مع أجسامنا زي مفعول المي..


أيام ما كان ما ييجي أدان المغرب إلا وإحنا رافعين رايات الإستسلام وصرنا بالبيجامات نحضر أفلام كرتون وفعاليات سبيستون الخاصة وننام عليها..
أيام ماكان العيد بهالبساطة… عيد!


ومع انو العيد تغير أو إحنا الي تغيرنا، بس بالنسبة إلي طول ما أهلي وأحبابي بعافية وسعادة وخير.. هاد هو العيد <3

كل عام وانتم وكل أحبابكم بألف خير وفرح وسعادة وتقبل الله طاعاتكم :)

المصدر هنا

About جليلة 94 Articles
نحن مجموعة من الكتاب والمفكرين... نسعى للارتقاء بالمحتوى العربي الموجه للمرأة

Be the first to comment

Leave a Reply

Your email address will not be published.


*