آخر الأخبار

الحجاب والتنمر الاجتماعي – علا عليوات

  علا عليوات

هذا البوست ليس الهدف منه إثبات فرضية الحجاب من عدمها، وأي تعليقات تحتوي على نصوص دينية لإثبات وجوب الحجاب أو عدم وجوبه سيتم إخفاؤها

لا، هذا مش بوست غزل في الحجاب وجمال البنت المحجبة، أنا شخصياً طلعت من هاي المرحلة، وبشعر باستفزاز من محاولات إضفاء الرومنسية على كل شيء في حياتنا عشان نبرره للناس أو لأنفسنا. وبلاقي إنه الواقعية وتسمية الأشياء بمسمياتها بتخليك تتقبلها وتفهمها وتتعايش معها بشكل أفضل 

صارلي فترة طويلة بدي أكتب في هاد الموضوع، ومترددة، وقبل فترة كنت بحكي مع صديق عنه فقال لي يا ريت تكتبي عنه لأنه الرجال مفكرينه مزحة. وأعتقد إني كوحدة محجبة من 15 سنة، بطلعلي أحكي كم شغلة، خاصة مع الأشياء اللي عم بشوفها كتير والتي لم تعد تُحتمل، وكان آخرها التلميح لبنت تركت الحجاب بأنها ارتدت عن الإسلام، فهون طفح الكيل

صارلي فترة طويلة بدي أكتب في هاد الموضوع، ومترددة، وقبل فترة كنت بحكي مع صديق عنه فقال لي يا ريت تكتبي عنه لأنه الرجال مفكرينه مزحة

أنا تحجبت بقرار شخصي، ومن باب التدين والعبادة وليس من باب العادات والتقاليد، وبدون أي ضغط من العائلة، ودائماً بحكي إني لو كنت متحجبة من باب العادات والتقاليد كان تركته زمان. نعم، مش رح أقعد أقول أنا بحب حجابي وبنبسط لما أغطي شعري وبحس بمش عارف شو… صراحة، مرات كتير بيجي عبالي أزبط شعري وأطلع فيه بدون ما أغطيه، ومتأكدة إنه هاد شعور مشترك بين كل وحدة محجبة أو حتى متنقبة. لكن السبب الوحيد اللي بخليني ما أعمل هيك هو إني مؤمنة بإنه هاد فرض وهاي عبادة بعملها لله تعالى. (مجدداً، هاي مش دعوة عشان تيجي تعطيني أدلة إنه الحجاب مش فرض، بعرف كل شيء رح تحكيه وهذه قناعتي)

وبما إنه الحجاب فرض فهو تكليف وبالتالي ممكن يكون صعب وجهاد للنفس، عادي. زي ما الصيام فرض وتكليف، في حدا بحب يجوع ويعطش وما يقدر يشرب مي والحرارة 35؟ لأ طبعاً، بس بتعمل هيك عشان بتعرف إنه هاد فرض وامتحان من ربنا.

ليش البنت لما تتحجب كل المجتمع بشعر إنها صارت تدين إلهم بشي معين وإنهم مسؤولين عن محاسبتها على أفعالها وعلى اختياراتها؟

بما إنه وضحت هاي النقطة واللي يا رب تكون وصلت وما ألاقي حدا بتهمني بالتضليل ونشر الفتن، ندخل في صلب الموضوع

ليش البنت لما تتحجب كل المجتمع بشعر إنها صارت تدين إلهم بشي معين وإنهم مسؤولين عن محاسبتها على أفعالها وعلى اختياراتها؟

مثلاً، اللي بقولك: يا بتتحجبي صح يا تتحجبيش. شو يعني تتحجبي صح؟ حيقولك يعني لا تشمر ولا تبين رقبتها ولا تلبس صندل وما إلى ذلك

خليني أوضح إشي صغير هون. فش إشي بالدين اسمه حجاب، بمعنى إنه اللي بنحكي عنه حجاب اسمه الصحيح غطاء الرأس، وهو جزء من الزي الشرعي. وفيه خلاف عليه على فكرة، لكن اللي ما عليه خلاف هو وجود شروط للباس الشرعي في الإسلام. بمعنى إنه غطاء الرأس اللي كل الهليلة صايرة عليه هو جزء من ذلك وليس كله. وأنا مرات بشوف وحدة مش مغطية راسها تعتبر محجبة أكتر من وحدة مغطية راسها. بالتالي إذا إذا البنت شمرت عن إيديها أو لبست بلوزة مش طويلة عالآخر فبالتالي هي عم بتحاول تلتزم باللباس الشرعي لكنها مقصرة، وإنت مش شغلك تيجي تحاسبها، ولا تقولها إشلحي الحجاب عن راسك، لأنه القاعدة المهمة جداً تقول: ما يُترك كله لا يُترك بعضه. أنا يمكن ملتزمة 70%، بكرا يمكن أكون ملتزمة 90%، بعده يمكن أكون ملتزمة 50%، ربنا اللي رح يحاسبني مش إنت

أضف إلى ذلك أخي الرجل إنه إنت مش ممكن تتحمل تحط حجاب على راسك يوم، فبلاش مزاودة. وأضف كمان إنه إنت لما تقطع بالصلاة أو لما تصلي بسرعة وبدون خشوع أنا ما باجي بقوللك يا بتصلي صح يا تصليش.

الشيء الآخر الكتير مهم، ليش لما بنت تخلع الحجاب كل المجتمع بحاكمها؟ الحجاب بالآخر هو عبادة بينها وبين ربها، والإيمان بزيد وبنقص، مين فينا إيمانه ثابت؟ مين فينا كان وضل ملتزم بعبادة بنفس الدرجة طول عمره؟ لكن الحجاب عبادة ظاهرة، مما يعطي فرصة للجميع للمزاودة وإطلاق الأحكام. والناس بتتغير، هاي البنت تغيرت، مش قادرة تضل مغطية راسها، وإنما ممكن تضل حاطة الحجاب خوفاً من الناس، وهاد الإشي رح يوجد عندها امتعاض من الحجاب بل وربما امتعاض من الدين نفسه، وبهذا بكون التنمر المجتمعي أبعدها عن الدين بدل ما يقربها منه

والأنيل من هيك إنه التنمر المجتمعي هاد بحط البنت بموقف دفاعي بخليها تصير تدافع عن قرارها بإنها تنكر الحجاب من أساسه. بتصير تقولك الإيمان بالقلب وكذا والمظاهر مش مهمة. هلأ لو هي مؤمنة بهاد الحكي عن جد هي حرة، لكن بنفس الوقت هي ممكن تكون مؤمنة بهاي العبادة وتضطر تنكرها عشان تبرر موقفها لنفسها وللآخرين، وهي ما كانت مضطرة، لأنه المجتمع مش قادر يتقبل إنها بشر وإنها ضعيفة وإنها ممكن تترك عبادة أو ترتكب معصية، إلا ما يحاكموها ويحاسبوها. فيا عزيزتي اللي بتتركي الحجاب لا تبرري ولا تدافعي ولا تخليهم يجروكي لنقاشات ما إلها داعي، واللي بقول كلمة منيحة يا حياه الله واللي بتهمك بأي إشي رح يتحاسب على اتهاماته

لأنه المجتمع مش قادر يتقبل إنها بشر وإنها ضعيفة وإنها ممكن تترك عبادة أو ترتكب معصية، إلا ما يحاكموها ويحاسبوها. فيا عزيزتي اللي بتتركي الحجاب لا تبرري ولا تدافعي ولا تخليهم يجروكي لنقاشات ما إلها داعي

أنا شخصياً ما عندي مشكلة مع الحجاب نفسه، لا شكله ولا دلالته، لكن هل بضمن إني ما أشلحه طول حياتي؟ لأ طبعاً. مين بقدر يضمن أي إشي. بتمنى الله يثبتني عليه لكن ما بضمن، وما بعرف. لكن بكون كذابة إذا ما حكيت إني فكرت بالموضوع. صراحة. لكن في النهاية بكون بكذب على حالي إذا حكيت إني مش مقتنعة فيه، لأنه عندي أسباب كافية تخليني أشوف الحكمة منه ومش رح أدرجها هون لأنه مش هاد الهدف. الموضوع مش موضوع إخفاء فتنة وما إلى ذلك فقط. أساساً ممكن أطلع بشعري بشكل ما ألفت نظر قرد بدون ما أتحجب. فمش هاد السبب الوحيد.

نيجي لنوع آخر من التنمر، الناس اللي ضد الحجاب وشايفينه أكبر مصيبة في تاريخ الأمة.

نيجي لنوع آخر من التنمر، الناس اللي ضد الحجاب وشايفينه أكبر مصيبة في تاريخ الأمة.

طبعاً في ناس بقولوا إنه الحجاب مش فرض وبيعطوك أدلة، وأنا بعترف إنه الموضوع في خلاف، لكن انتبهوا إلى إنه الخلاف حول غطاء الرأس، مش حول اللباس بشكل عام. لكن للأسف بتلاقي اللي ضد الحجاب وبقول إنه مش فرض بيحكي كإنه فش ضوابط للباس بشكل عام، يعني يا بتتحجبي يا بتلبسي شورت وتانك توب وبتنزلي عالشارع. نا شخصياً لما كانت الأفكار تلعب براسي وأكون زهقانة وجاي عبالي ما ألبس حجاب كنت أقول لحالي: ما هو عليه خلاف، بس برجع بقول إنه هو بساعدني ألتزم على ما لا خلاف فيه، ومن باب اتقاء الشبهات كمان. وبلاش نفتح موضوع إنه في خلاف أو ما في خلاف، لأنه الخلاف موجود، عدم تقبلك له موضوع آخر

بعدين بتلاقيهم بحكوا عن الحجاب كشكل من أشكال قمع المرأة، هون خليني أوضح نقطة: المحجبات بنقسموا لـ3 أقسام، المحجبة بقرارها الشخصي ومن باب التدين، والمحجبة من باب العادات والتقاليد برضه كقرار شخصي، والمحجبة غب عنها. النوع الأول ملكاش خص فيه لأنها حرية دينية، والنوع التاني زيها زي أي واحد بلبس حطة وعقال، وإذا شايفه ظاهرة مش حضارية فعليك بتغيير العادات والتقاليد نفسها، أما النوع الثالث فمشكلتها أعتقد أكبر من الحجاب نفسه، مشكلتها في القمع الممارس عليها، ويمكن تمكينها للتخلص من هذا القمع يؤدي إلى إنها تشلح الحجاب ويمكن لأ، الفكرة إنه هي محتاجة للتمكين اللي بخلي قرارها بإيدها، مش إنه تقنعها أو تقمع أبوها إنه الحجاب مش فرض

الخلاصة، الحجاب أو الالتزام باللباس الشرعي أو سمه ما شئت عبادة بين البنت وربها، وعلاقتها بربنا إشي مش من اختصاصك. إنت غض بصرك وكتر الله خيرك، بس إنك تكون بصباص وعينك بتندب فيها 100 رصاصة بعدين تيجي تقول هاي البنت مشمرة عن إيديها إذا فهي لا تحترم الحجاب فإنت قليل حيا بصراحة

قد يتبع، مش أكيد

About جليلة 94 Articles
نحن مجموعة من الكتاب والمفكرين... نسعى للارتقاء بالمحتوى العربي الموجه للمرأة

6 Comments on الحجاب والتنمر الاجتماعي – علا عليوات

  1. شكرا على مةضوعك، وبأيدك إنه الحجاب مو عبادة سهلة.. ومع الوقت ممكن تحبيه وبتصيري تحسي بشعور ال”مش عارفة شو”.. بس عندي إزا بتسمحيلي نقطتين..
    أولا عن شلح الحجاب.. كونك محجبة من سنين.. وكون الحجاب زيادة في السترة.. إزا حد فات وانت مو لابسة عراسك وشافك بالغلط، ما بتحسي إنه إشي كبير؟ عبادة الحجاب تحديدا لأنه فيها ستر، ولأنه البنت المحترمة بتحب الستر، كتير صعب ما ننظر لبنت شلحت الحجاب نظرة سلبية.. بالزبط متل ما انت بتتطلعي على البنت اللي لابسة لبس بالمرة وماشية بالمول وبتحكمي على حياءها..

    بالنسبة للنقطة التانية.. اللي بتتحجب ومشمرة كمامها أو مبينة شعرها أو الحلق أو الرقبة أو نص الساق…. إلخ. الحجاب إله احترامه.. الموضوع مش موضوع انتقاد، الموضوع إنه إزا ما ضلينا وراء هاي الظواهر على الأقل بإنكارها بين بعض راح تضل موجودة وإزا منبررها بتنتشر، وراح تصير بنتي وبنتك بس تيجي تتجب تقارن وتتحجب زي هيك، ويصير حجابنا حجاب “نسوان” أو “حجات” وما رح يرضيكي بنتك تطلع بحجاب و فيزون..
    وبشكل عام.. لما بدنا نبرر على الملأ أي ظاهرة أو تصرف، بدنا نتخيل حالنا منبرره لأخونا أو بنتنا.. وشكرا

  2. يعطيكم العافية جميعاً،
    الموضوع هاد بالنسبة الي كرجل كان مو كثير مهم ومعقد بالعكس كان واضح وجلي وما فيه اي شبهة وهاد الإشي لأنو جميع أفراد عائلتي البنات من قريب ومن بعيد محجبين فكان الموضوع بالنسبة لإلي كثير عادي، يعني الحجاب هو فرض وجميع البنات المحجبات مقتنعين فيه مية بالمية و البنات الغير محجبات هم تاركين لهاي الفريضة ما أجتهم الفرصة المناسبة انهم يقتنعوا مية بالمية فيه.

    من فترة قريبة خضت بهاد النقاش مع اخواتي و احدى خالاتي (المحجبات) انو لو كان ما في اي قيود مجتمعية وما في احد رح ينظر الك بنظرة سلبية وكان عندك حرية الاختيار المطلقة انك تتركي الحجاب هل ممكن تتركيه؟
    صراحة الرد اللي سمعتو منهم كان هو السبب اللي خلاني احس اكثر مع البنات المحجبات وغير المحجبات وقديش انو أغلبية البنات التي تكاد ان تكون أغلبية مطلقة فكروا او ما زالو يفكروا بأنهم يخلعوا الحجاب وقديش انهم شايفينوا صعب التمسك فيه، بل بالعكس للأسف شايفين انو المجتمع وتفكير الناس هو اللي مخليهم يلبسوه وليس اقتناعهم فيه كفريضة تؤجر عليها اذا حافظت على حشمتها أولاً ثم تغطية رأسها ثانيا. فوجدت انو الموضوع مش كثير سهل وانو ما بحقلي كشب اشوف بنت محجبة بس لباسها مش محتشم احكي انو مش محترمة حجابها و لازم يا تحتشم بالكامل او تخلع الحجاب، لأنو من البداية انا كأخ او كأب او قريب أجبرتها وأقنعتها بطريقة او باخرى انو الحجاب هو العفة و احترام للنفس وللدين ونسيت انو من أشكال العفة و احترام النفس والدين هو ارتداء الحجاب.

  3. الموضوع تفسيره كتير أبسط من هيك, المجتمع اجمالا بحط البنت سواء محجبة أو لأ تحت المجهر, وكل البنات بتعلق عليهم والكل بنظر عليهم, والبنات كمان بعملوا هيك ببعض. أنا مو محجبة وصراحة تعجب علي من كتير ناس بعتبروا حالهم “محافظين” مع أنه سلوكي ما في تنين بختلفو عليه. عشان هيك الحل أنه المجتمع (ستات والرجال) يبعد عن التسلط ويتعامل مع البنت باحترام أكتر.

Leave a Reply

Your email address will not be published.


*